البار مغمور ب لون الغُروب ، انا باقي واقف مور الكونطوار ، الخدمة قليلة و الملل كثير ، الصوت الوحيد هو ديال غيتار بيبي-كينغ كيجبّد فالبلوز..

طلّيت على الشارع من الشرجم.. لقيت الشارع غريب ، الفراغ و الحرارة ، حسّيت براسي فشي حُلم ، لكن بقيت كنطّل ..

واحد الزعرا جاية بشوية فوق بيكالا انجليزية ،

كتشوف على جهة ليمن الديور الفيكتورية و الورود المعلقّة فوق الشراجم ، كتشوف على ليسر و تلقى نفس المنظر . قلت مع راسي هممم شي سائحة هادي..

منين زادت قرّبات ، شافت البار ديالنا، بانت مترددة فالاول ، لكنها حبست ، حيدّات نضاضر الشمس ، علّات عينيها و قرات اسم البار ، ثم حطّت البيكالا حدا الباب و دخلت .

كانت لابسة كسوة بيضا مورّدة بلون ازرق بان متناسق مع عينيها ، عندها ملامح جمال إسباني .. معلّقة كاميرا قديمة ، و اكتافها كيبانو حومر بالشمس .

فالاول شافت الديكور لداخل ، قرّبات للورد حدى الشرجم و قاستو ، ثم شافت فالحيط صورة أثرية لجريدة ' ديلي مايل ' فيها خبر تنصيب إليزابيث الثانية ملكة على بريطانيا ، خدات الكاميرا و صوّرات الجريدة .

بقيت متبعهّا بإعجاب ، حتى مشات لأقرب طاولة ، دارت يدّيها مور الصاية و هبطّاتهم ثم جلسات بعناية ،

و أخيرا شافت فيّا ، بحال إلى كانت فهاد البار كتشوف شي فيلم كلاسيكي بداتو كرونولجيّا من نهار تحلّ حتى جيت ليه .

بقات كتشوف فيا مبتسمة، أو كتسايني نجي نشوف شنو بغات تشرب ، قلت مع راسي هادي قطعاً شي سائحة ما فاهماش قواعد الpub.. و أنها لا بغات شي حاجة خصها تطلبها عند الكونطوار .

خديت كارني و ستيلو و مشيت عندها :

- كود أفترنون ميس

- هاي عندكم ستيلا ؟ ( لكنة فرنسية )

- موجودة

غادي نحكيلكم أنّه واخا هادي شي ساعة باش مشات ،

لكن قلت ضروري نشارككم شنو دار فذهني منين بديت نكبّ ستيلا ونشوف فيها من بعيد،

جاني عليها فونطازم غريب ،

خلّاني نتصوّر أنّي غادي ندّيها معي للدار، تحت تأثير شي مخدّر فهاد الكاس اللي كنكّب ، غادي نعرّيها تماما، و نربطها مع شي كرسي.. ثم نعمرّ فمها بشفرات الزيزوار بين اضراسها.. نشدّ يدّيها من الأطراف بعناية..

نشوف فعينيها الزورق بابتسامة.. و نبدا نغرس رأس الابرة بين الضفر و اللحم ، نغرس حتى تغبر الابرة كاملة..

ثم نجيب ليها نورة ( الكلبة ) و نخلّيها تبدا تلعق فأشد مواضيع جسدها حساسية..

و أخيرا غادي نرجع انا للوراء.. نطلق أحسن ألبوم ' مايل ديفيس ' ديال الجاز..

نشد ويسكي بيد و كارو باليد الأخرى.. رجل فوق رجل و نبدا نتفرّج شي ساعة أو و انا كنكمي و نسد عيني ندخل فحُلم وسط حُلم وسط أحلام ، نتمووووسق و ناخد نفس عميييق ، هي كتلذذ بالعذاب ، و أنت كنتلذذ أكثر بالمشهد .

كل هذا و هي لا تحرك ساكنا، لا تُمانع و لا تقاوم تحت تأثير نشوة البراكين الخامدة المتفجرّة فيها.

هكذا أشبٓع خيالي نزواته الغريبة ، فقتلتُ الوقت و الضجر بحبك تلك القصّة .

منين سدّيت على ستيلا ، كان بيبي-كينغ باقي كيجبّد فالبلوز ، مشيت لعندها للطاولة فين جالسة و حطّيتها لها الكاس بكل أدب و عناية ، تمنّيت لها الاستمتاع بالمشروب ، فالمقابل ، اعطاتني عشرة باوند بوربوار على السيرفيس اللي وصفاتو ب ' المحترف و الطيّب ' .